താഴ്ന്ന് പറന്ന ഡ്രോൺ വായിലാക്കി കടിച്ചുപൊട്ടിച്ച് ചീങ്കണ്ണി; വിഡിയോ പങ്കുവച്ച് സുന്ദർ പിച്ചെ!

Grab image from video shared on Youtube by Viral Vids

   

ഇരയെ ഞൊടിയിടയിൽ വായിലാക്കാൻ മിടുക്കരാണ് ചീങ്കണ്ണികൾ. മുന്നിലെത്തുന്ന ഇരയെ വായിലാക്കുന്നതു പോലെ  താഴ്ന്ന് പറന്ന ഡ്രോൺ വായിലാക്കിയ ചീങ്കണ്ണിയുടെ ദൃശ്യമാണ് ഇപ്പോൾ സമൂഹമാധ്യമങ്ങളിൽ നിറയുന്നത്. രസകരമായ ദൃശ്യങ്ങളും ബ്ലോഗുമൊക്കെ പങ്കുവയ്ക്കാറുള്ള  ഗൂഗിൾ സിഇഒ സുന്ദർ പിച്ചെയാണ് ട്വിറ്ററിലൂടെ ഈ വിഡിയോ പങ്കുവച്ചത്.

ഫ്ലോറിഡയിലെ എവർഗ്ലേഡ്സിൽ നിന്നും ചിത്രീകരിച്ചതാണ് വിഡിയോ.കലിഫോർണിയ ആസ്ഥാനമായി പ്രവർത്തിക്കുന്ന ഡ്രോൺ കമ്പനി മാനേജരായ ക്രിസ് ആൻഡേഴ്സണ്‍ പങ്കുവച്ച വിഡിയോയാണ് സുന്ദർ പിച്ചെ റീട്വീറ്റ് ചെയ്തത്. ചീങ്കണ്ണിയുടെ തലയ്ക്കു മുകളിലായി താഴ്ന്നു പറന്ന ഡ്രോൺ അത് വായിലാക്കുകയായിരുന്നു. ചീങ്കണ്ണിയുടെ വായിലായതിന് പിന്നാലെ അത് വായിലിട്ട് കടിച്ചുപൊട്ടിക്കുകയും  വായിൽ നിന്ന് പുകപടലം ഉയരുന്നതും വിഡിയോയിൽ കാണാം.

ചീങ്കണ്ണിയുടെ ക്ലോസപ് ഷോട്ട് എടുക്കാൻ ശ്രമിക്കുമ്പോഴാണ് അത് വായിലാക്കിയതെന്ന് ഡ്രോൺ നിയന്ത്രിച്ചയാൾ കുറ്റസമ്മതം നടത്തിയിട്ടുണ്ട്. സെൻസറുകൾ ഉള്ളതു കൊണ്ട് ഡ്രോണിന് അപകടം പറ്റില്ലെന്ന ധൈര്യത്തിലാണ് അത്രയും താഴ്ത്തി പറപ്പിക്കാൻ ശ്രമിച്ചതെന്നും ഇയാൾ വ്യക്തമാക്കി. വിഡിയോ പുറത്ത് വന്നതിന് പിന്നാലെ ഡ്രോണുകളുടെ ഉപയോഗം നിയന്ത്രിക്കണമെന്നും മൃഗങ്ങളുടെ സ്വച്ഛതയ്ക്ക് വിഘാതം സൃഷ്ടിക്കുന്ന തരത്തിലുള്ള പ്രവർത്തനങ്ങൾ ഒഴിവാക്കണമെന്നും സംഘടനകൾ ആവശ്യപ്പെട്ടു. ക്രൂരത കാണിച്ചവർക്കെതിരെ നടപടി വേണമെന്നും നിരവധി പേർ ആവശ്യപ്പെടുന്നുണ്ട്.