ഇതാ, പ്രപഞ്ചത്തിന് ഒരു ടൈം മെഷീൻ..
പ്രപഞ്ചത്തെ കുറിച്ചുള്ള മനുഷ്യന്റെ ധാരണകളെ മാറ്റങ്ങള്ക്കും തിരുത്തലുകള്ക്കും വിധേയമാക്കിയ നിരവധി വിപ്ലവങ്ങളെ ശാസ്ത്രത്തിന്റെ ചരിത്രത്തില് നിന്നും നമുക്കു കണ്ടെടുക്കാവുന്നതാണ്. ഭൂമിയെ കേന്ദ്രമാക്കുന്ന ലോകത്തിനു പകരം സൂര്യകേന്ദ്രലോകത്തെ സ്ഥാപിക്കുന്ന വിപ്ലവമാണ് കോപ്പര്നിക്കസിലൂടെ സംഭവിച്ചത്. സൂര്യനെന്ന നക്ഷത്രത്തെ ചുറ്റുന്ന ഒരു ചെറിയ ഗ്രഹമായി ഭൂമി മാറ്റപ്പെട്ടു. പിന്നീട് ഹബിൾ ബഹിരാകാശ ദൂരദര്ശിനിയിലൂടെ മനുഷ്യന് ഒരു പുതിയ പ്രപഞ്ചത്തെ തന്നെ കാണുകയായിരുന്നു! ഭീമാകാരങ്ങളായ നിരവധി ഗാലക്സികള് നിറഞ്ഞ പ്രപഞ്ചത്തില്, ശരാശരി വലിപ്പം മാത്രമുള്ള ആകാശഗംഗ എന്ന ഗാലക്സിയിലെ അതിസാധാരണമായ ഒരു ചെറുനക്ഷത്രത്തിനെ ചുറ്റി കറങ്ങിക്കൊണ്ടിരിക്കുന്ന ചെറിയൊരു ഗ്രഹത്തിലാണ് താന് വസിക്കുന്നതെന്നു പ്രപഞ്ചകേന്ദ്രസ്ഥാനീയനെന്നു കരുതിയിരുന്ന മനുഷ്യന് സ്വന്തം കാഴ്ചയിലൂടെ തന്നെ ബോദ്ധ്യപ്പെടുകയായിരുന്നു!
ഭൗതികപ്രപഞ്ചത്തെ കുറിച്ചുള്ള പഴയ ധാരണകളെ പൊളിച്ചെഴുതുന്നതിനും നവീകരിക്കുന്നതിനും പുതിയ ധാരണകളെ സ്വരൂപിക്കുന്നതിനും അഭൂതപൂര്വ്വമായ സംഭാവനകളാണ് ഹബ്ള് ടെലസ്ക്കോപ്പ് നല്കിയത്.
എന്നാൽ, പ്രപഞ്ചത്തെക്കുറിച്ചുള്ള നമ്മുടെ ഇന്നുവരെയുള്ള സർവ്വ ധാരണകളും ഒരിക്കൽ കൂടി മാറ്റപ്പെടാൻ പോവുകയാണ്!!
ഈ വർഷം അവസാനം പുതിയ ജെയിംസ് വെബ് ബഹിരാകാശ ദൂരദർശിനി ബഹിരാകാശത്തിലേക്ക് വിക്ഷേപിക്കുമ്പോൾ, ജ്യോതിശാസ്ത്രജ്ഞർക്ക് പ്രപഞ്ചം പര്യവേക്ഷണം ചെയ്യുന്നതിനുള്ള മറ്റൊരു ഉപകരണം മാത്രമായിരിക്കില്ല അത്. അത്യാധുനിക സ്പെക്ട്രോസ്കോപ്പി സാങ്കേതികവിദ്യ ഉപയോഗിച്ച്, ബഹിരാകാശത്തിന്റെ ഇരുട്ടിലേക്ക് നോക്കാനും
പ്രപഞ്ചത്തിന്റെ ഏറ്റവും വിദൂര കോണുകളിലെ ഏറ്റവും മികച്ച വിശദാംശങ്ങൾ വിശിഷ്ടമായ മിഴിവോടെ വെളിപ്പെടുത്താനും വെബ്ബിന് കഴിയും. മുൻഗാമിയായ ഹബിൾ ബഹിരാകാശ ദൂരദർശിനിയേക്കാൾ നൂറിരട്ടി സെൻസിറ്റീവ് ആണ് ജെയിംസ് വെബ് സ്പേസ് ടെലസ്ക്കോപ്പ്.
ഇത് എക്സോപ്ലാനറ്റുകളെക്കുറിച്ചുള്ള നമ്മുടെ ധാരണയിൽ ഒരു വിപ്ലവം തന്നെ സൃഷ്ടിക്കും, കൂടാതെ നമ്മൾ എവിടെ നിന്നാണ് വന്നതെന്നും പ്രപഞ്ചത്തിൽ മറ്റെവിടെയൊക്കെ വാസയോഗ്യമാകുമെന്നും പഠിക്കാൻ ഇത് നമ്മെ സഹായിക്കും. ഒരു പക്ഷേ, അന്യഗ്രഹ ജീവിതങ്ങളും ഇത് കണ്ടെത്തിയേക്കാം..
Comments
Post a Comment