ബ്രസീലിനെ മൂടിയ പൊടിക്കാറ്റ് ഹബൂബ്? 92 കി.മി വേഗം, 10 കി.മി ഉയരത്തിലെത്തി

Metbeat Weather Desk

ബ്രസിലീനെ ശ്വാസം മുട്ടിച്ച് കഴിഞ്ഞ ദിവസം വീശിയ പൊടിക്കാറ്റിന് 92 കി.മി വേഗത. സാവോപോളോ സംസ്ഥാനത്തെ നാലു ജില്ലകളിലെ നിരവധി നഗരങ്ങളിലാണ് ശക്തമായ പൊടിക്കാറ്റുണ്ടായത്. അപൂര്‍വമാണ് ഇത്തരത്തില്‍ ശക്തമായ പൊടിക്കാറ്റെന്ന് വിദഗ്ധര്‍ പറയുന്നു. 10 കി.മി ഉയരത്തില്‍ വരെ പൊടിക്കാറ്റെത്തി. വ്യോമഗതാഗതത്തെയും ബാധിച്ചു. പൊടിക്കാറ്റിന്റെ കാമറ ദൃശ്യങ്ങള്‍ വൈറലാകുകയാണ്. പൊടുന്നനെയാണ് പൊടിക്കാറ്റ് നഗരംമൂടിയതെന്ന് പ്രദേശവാസികള്‍ പറഞ്ഞു. 92 കി.മി വേഗതയിലുള്ള ഗസ്റ്റ് വിന്റും വരണ്ട കാലാവസ്ഥയുമാണ് പൊടിക്കാറ്റിന് കാരണമെന്ന് ബ്രസീല്‍ നാഷനല്‍ ഇന്‍സ്റ്റിറ്റ്യൂട്ട് ഓഫ് മീറ്റിയോറളജിയിലെ മീറ്റിയോറളജിസ്റ്റ് ആന്‍ഡ്രിയ റമോസ് പറഞ്ഞു. ബ്രസീലില്‍ ഈയിടെയായി കടുത്ത ചൂടാണ് അനുഭവപ്പെടുന്നത്. ഭൂമി വരണ്ടുണങ്ങിയ നിലയിലാണ്. ഇടിയോടുള്ള മഴക്കൊപ്പം വീശുന്ന ഗസ്്റ്റ് വിന്റുകള്‍ പൊടിക്കാറ്റിന് ഇടയാക്കാറുണ്ടെങ്കിലും ഇത്രയും വലിയ പൊടിക്കാറ്റ് പലര്‍ക്കും ആദ്യനുഭവമായി. 

ഹബൂബ് പൊടിക്കാറ്റ്?
ആയിരക്കണക്കിന് അടി ഉയരത്തില്‍ വരെയെത്തുന്ന ഹബൂബ് പൊടിക്കാറ്റിന്റെ മാതൃകയിലാണ് ബ്രസീലിലും പൊടിക്കാറ്റുണ്ടായത്. ഹബ്ബ് എന്ന അറബി വാക്കില്‍ നിന്നാണ് ഹബൂബ് എന്ന വാക്കുണ്ടായത്. സുദാനിലെ ഖാര്‍ത്തൂമിലും മറ്റും ഇത്തരം പൊടിക്കാറ്റുണ്ടാകാറുണ്ട്. അവിടെ നിന്നാണ് ഈ വാക്കുണ്ടായത്. വേഗത്തില്‍ വീശിയടിക്കുന്ന പൊടിക്കാറ്റ് എന്നാണ് ഇതുകൊണ്ട് അര്‍ഥമാക്കുന്നത്. സാധാരണ ഇത്തരം പൊടിക്കാറ്റ് ഇടിയോടുകൂടെയുള്ള മഴയ്‌ക്കൊപ്പമാണ് ഉണ്ടാകാറുള്ളതെന്നും അപൂര്‍വമാണെങ്കിലും ലോകത്ത് പലയിടത്തും ഉണ്ടാകാറുണ്ടെന്നും അമേരിക്കന്‍ മീറ്റിയോറളജിക്കല്‍ സൊസൈറ്റി (എ.എം.എസ്) പറയുന്നു. എന്നാല്‍ ഹബൂബുകള്‍ ബ്രസീലില്‍ അത്യപൂര്‍വമാണ്. കാലാവസ്ഥാ വ്യതിയാനമാണോ ഇതിനു പിന്നിലെന്ന് സംശയിക്കേണ്ടിയിരിക്കുന്നു. പൊടിക്കാറ്റുണ്ടായപ്പോള്‍ ഹ്യൂമിഡിറ്റി 20 ശതമാനത്തിലും താഴെയായിരുന്നു ഈ മേഖലകളിലുണ്ടായിരുന്നതെന്ന് മെറ്റ്ബീറ്റ് വെതറിന്റെ ആപ്പിലെ ഡാറ്റയും വ്യക്തമാക്കുന്നു. 

ബ്രസീലില്‍ മഴയും തണുത്ത കാലാവസ്ഥയും വരുന്നു
വടക്കന്‍ ബ്രസീലില്‍ തണുത്ത കാലാവസ്ഥയും മഴയും വരാനിരിക്കുന്നതിനാല്‍ ഇത്തരം പൊടിക്കാറ്റ് ഇനിയുണ്ടാകാന്‍ സാധ്യത കുറവാണെന്നാണ് ഞങ്ങളുടെ നിരീക്ഷകരുടെ അഭിപ്രായം. നിരവധി കാലാവസ്ഥാ ഘടകങ്ങള്‍ അനുകൂലമാകുന്നതോടെയാണ് ഇത്തരം വന്‍ പൊടിക്കാറ്റുകളുണ്ടാകുന്നത്. ഹബൂബ് സാഹചര്യത്തിന് അനുകൂലമായ കാലാവസ്ഥ ബ്രസീലില്‍ ഉടനെ മാറുന്നതിനാല്‍ ഇനി ഇത്തരം പൊടിക്കാറ്റ് ഉണ്ടാകില്ലെന്നാണ് കരുതുന്നത്.